Mtoto wa Sheikh Yahya atabiri mazito

Mtoto wa aliyekuwa mtabiri bingwa, Sheikh Yahya Hussein, Maalim Hassan Hussein ametabibiri kuwa Katiba Mpya itapatikana kwa mbinde, kwani kutakuwa na malumbano na utata hasa kuhusu ajenda ya Serikali tatu.

Katika utabiri wake pia amesema kuna kiongozi mmoja wa chama cha siasa nchini ambaye atandolewa kwenye uongozi na kitendo hicho kinaweza kumsababishia anguko la kisiasa kwake au hata kifo.

Alisema hali kadhalika, kiongozi mmoja wa kisiasa mwenye wafuasi wengi na umaarufu mkubwa, mwishoni mwa mwaka huu ataugua kichaa na kumsababishia kuanguka kisiasa. Hussein alisema mbali na hayo, Tanzania itakumbwa na msiba wa kitaifa huku  umaarufu wa Rais Jakaya Kikwete, ukizidi kuongezeka hasa kwa kutatua migogoro mikubwa nchini.

Alisema Rais Kikwete pia atafanya tukio kubwa la kutikisa nchi, lakini tukio hilo litaleta neema.

“Uadui wa taasisi au chama utakuwa mkubwa na kuna dalili za kupigana kwa wafuasi wa vyama pinzani, Tanzania itaingia kwenye mzozo na nchi jirani na wanasiasa wataendelea kukumbwa na kashfa za ngono,” alisema.

Akizungumza na waandishi wa habari Dar es Salaam jana, Maalim Hussein alisema, “Mwaka huu umenzia siku ya Jumatano na unaashiria shida, maradhi na vifo kwa watu maarufu wakiwemo wasanii na wanahabari.”

Alisema katika mambo ambayo ameyatabiri ni vyema Serikali ikawa makini kwani mwaka huu kuna majanga mengi ambayo yatatoke hasa vifo, shida na maradhi.

Alisisitiza kuwa kwa upande wanasiasa na viongozi wa dini watafariki, pia wasanii, wanahabari na wanasiasa. Hivyo ni vyema wakawa makini kwa mambo wanayoyafanya.

“Mwaka huu unaonyesha kuwa kutakuwa na neema kwa vijana hasa wasanii, wanahabari, lakini  kwa upande wa vifo inaonyesha watakufa wengi, ni vyema wakawa makini,” alisema Maalim Hussein.