Waasi wamtaka Rais Kabila aachie madaraka

Kiongozi wa waasi wa Jamhuri ya Kati Paul Joseph Mukungubila ameikosoa Serikali ya nchi hiyo na kumtaka Rais Joseph Kabila aondoke madarakani.

Kauli hiyo ni baada ya shambulio ambalo lilifanyika mwishoni mwa Desemba ambapo watu waliokuwa na silaha walishambulia Uwanja wa Ndege wa Kimataifa wa Ndjili, kambi ya jeshi na kituo cha redio na televisheni ya Serikali.

Baada ya uvamizi huo Rais Joseph Kabila wa Jamhuri ya Kidemokrasia ya Kongo alitoa wito kwa wananchi akiwataka waimarishe mapambano ya pande zote.

Kwa upande wake msemaji wa Serikali Lamberte Mende Omalanga alitangaza kuwa watu hao ni magaidi waliotaka kuzusha wasiwasi na woga kwa wakazi wa Kinshasa kabla ya kuanza mwaka mpya.

Watu hao wanaotajwa kuwa ni wafuasi wa kiongozi wa kidini Paul Joseph Mukungubila, walipigana pia na askari usalama katika miji ya Kindu na Lubumbashi, lakini askari walifanikiwa kuwashinda waasi hao na kudhibiti miji hiyo.

Hata hivyo ujumbe uliotolewa Desemba 30 na Joseph Mukungubila kwa Wakongo ulionyesha kuwa mashambulizi hayo yalikuwa jaribio la mapinduzi.

Mukungubila alisema katika ujumbe huo kwamba lengo lake ni kuwakomboa Wakongo kutoka katika kile alichodai kuwa ni ‘utumwa wa Rwanda’.

Wanadiplomasia mbalimbali wanaamini kuwa, kuashiriwa utumwa wa Rwanda kunatokana na ukweli kuwa Laurent Kabila, baba wa Rais wa sasa wa Kongo aliyepindua Serikali ya dikteta Mobutu Seseko wa Zaire ya wakati huo, alikuwa akiungwa mkono na Rwanda.

Baada ya kuanguka utawala wa Mobutu Seseseko, Laurent Kabila ambaye alikuwa akisaidiwa na marais wa wakati huo wa Rwanda na Uganda, aliingia madarakani nchini Zaire na kubadilisha jina la nchi hiyo kuwa Jamhuri ya Kidemokrasia ya Kongo.

Hata hivyo, baada ya Laurent Kabila kushindwa kudhamini masilahi ya majirani wa Kongo na Marekani katika eneo la Maziwa Mkuu ya Afrika, waitifaki wake hao walianzisha vita vipya dhidi ya Kinshasa.

Vita vya ndani nchini Kongo kati ya mwaka 1998 na 2003 vilianza baada ya wanajeshi wa Rwanda na Uganda kushambulia mipaka ya nchi hiyo.

Katika vita hivyo Angola, Namibia na Zimbabwe zilikuwa zikimuunga mkono Laurent Kabila, na baada ya muda mfupi nchi 8 za eneo la Maziwa Makuu barani Afrika zikaingia kwenye vita hivyo, na ndiyo sababu mapigano hayo yakapewa jina la ‘vita vya kwanza vya dunia barani Afrika.