Mzee Small anena mazito ,BONGO MUVI MTASUBIRI MPAKA AFE NDO MTOE RAMBIRAMBI?

 
Msanii wa vichekesho ambaye pia ni mcheza ngoma za makabila mbalimbali wa Tanzania, Small Wangamba ‘Mzee Small’ anavyosimulia mateso yake ya sasa yanayotokana na maradhi ya kiharusi. Bado hajapata matibabu ya maana kutokana na sababu mbalimbali kubwa ikiwa kukosa uwezo kifedha, endelea…
Mzee Samal anasema alihangaika maeneo tofauti kupata tiba na kuna wakati shabiki wake mmoja aliwekeza fedha katika zahanati moja (jina halikumbuki) iliyopo eneo la Kariakoo ambao alikuwa anapata huduma ya kuchuliwa misuli.

“Huyo mtu alisikia naumwa akatafuta namba zangu za simu kisha akanipigia na kunielekeza sehemu ya kwenda kuchuliwa kwani nae aliwahi kukumbwa na tatizo kama hilo la kupooza mkono, lakini alipata nafuu kidogo,” anasema.

Small anasema tiba hiyo ya kuchuliwa viungo ilimpa nafuu kiasi lakini haikumuwezesha kurejea hali ya kawaida na siku za karibuni mambo yamebadilika. Hivi sasa sehemu ya mkono inapoungana na bega inaachana hali ambayo anasema inazidi kumchanganya.

Hali yake kiuchumi

“Mkono unakuwa kama unatengana na bega na mbaya zaidi nazidi kuishiwa nguvu na sina uwezo walau wa kujikokota na kutembea,” anasema na kuongeza kuwa hivi sasa hawezi kufanya shughuli yoyote zaidi ya kula na kulala.

Jambo baya zaidi kwake ni kuwa hana vyanzo vya mapato vya kueleweka.

“Pesa pekee ambazo zinanisaidia kidogo ni za kuuza maji, haponndiyo napata fedha ya kula na mke wangu Fatma Binti Saidi,” anasema.

Anaendelea kusimulia kwamba  wakati anaugua amekumbwa na mkasa wa binti yake (jina linahifadhiwa) kukatiza masomo kutokana na ujauzito.

Ilikuwa mwaka jana wakati binti hiyo akiwa Kidato cha Tatu.

“Watu wamemtia mimba mwanangu wa kike ambaye alikuwa ni wa tatu, lakini bahati nzuri aliyefanya hivyo ameamua kumuoa, basi sasa nitafanya nini na mimi hali yangu kama unavyoiona?” Anasema na kuongeza kuwa hata hivyo hajakata tamaa.

Mahusiano yake na Bi Chau

Small anasema Bi. Chau ni mke wake katika majukwaa ya sanaa tu si katika maisha  halisi. Anasema anaye mke na pia Bi Chau katika siku za karibuni ameolewa.

“Familia zetu ni marafiki, mke wangu anafahamiana vizuri na Bi Chau,” anasema.

“Yule ni mke wangu kikazi na sijawahi kuwa na uhusiano nae. Mashahidi wa jambo hili ni watu ambao huwa tunasafiri wote kikazi kuanzia wale wa mbio za Mwenge hadi makampuni ya sabuni na bidhaa zingine ambao huwa wanatutumia katika promosheni.”

Anasema msanii huyo nguli kuwa yeye na Bi Chau watu wengi walidhani ni mke na mume na hata wakisafiri kuna watu ambao wamekuwa wakiwachukulia chumba kimoja wakijua ni lazima watalala wote lakini haikuwahi kutokea kitu kama hicho.

“Walikuwa wanatuchukulia chumba kimoja lakini ikawa haiwezekani lazima tupate kingine na taratibu walituelewa hadi hivi sasa,” anasema na kuongeza kuwa wengi wanaamini kuwa ni mkewe au wana mahusiano ya kimapenzi dhana ambayo sio sahihi.

Anasema mke wake na Bi Chau wanaitana mtu na dada yake na anabainisha kuwa kama angekuwa na uhusiano wa kimapenzi na mwanamke huyo, wasingefika mbali na hata ushirikiano wao kikazi ungevurugika.

“Tena vurugu hizo zingehamia katika familia zetu,” anasema.

“Nashukuru Bi Chau tunaheshimiana sana na huwa anafika kunijulia hali na mwanamke huyo amekuwa na msaada mkubwa kwangu.

“Tunashirikiana katika masuala mbalimbali ya kimaisha na amekuwa akiniheshimu.”

Anasema kwa kuwa na Bi Chau kunafanya wanawake wengine wasimsogelee wanapokuwa safarini kwa kuamini kuwa yupo na mkewe wake hali ambayo anasema ni kama afadhari hususani kipindi hiki cha maradhi hususan Ukimwi.

“Wenzetu wengi hawapo tena kutokana na vifo ambavyo vinahusishwa na Ukimwi na wengi wao nyendo zao tulikuwa wote tunaziona na kutufanya tupate simulizi katika gari wakati wa kurudi au kutoka sehemu moja kwenda nyingine” anasema.
Alipotokea
 

Wangamba anasema alizaliwa kati ya mwaka 1952 au 1953 katika Kijiji cha Njia nne Wilaya ya Kilwa Mkoa wa Lindi na kwa bahati mbaya hakupata nafasi kusoma elimu yoyote.

Baada ya kufanya kazi tofauti kunako miaka ya sabini, alijiunga na Kundi la Agizo lililokuwa na maskani yake Mtaa wa Arusha Ilala.

Kama umeguswa na unataka kumsaidia Mzee Small, wasiliana nasi kwa simu 0718826468