Babu ashinda mamilioni ya kamari mjukuu wake kupangwa

BABU mwenye furaha wa kinda wa Liverpool, Harry Wilson,   amefanikiwa kuibuka na kitita cha Pauni 125,000 baada ya kutabiri kuwa siku moja mjukuu wake angeichezea timu ya taifa ya Wales wakati huo kinda huyo alipokuwa na umri wa miezi 18 tu.

Wilson ambaye yupo katika timu ya vijana ya Liverpool, aliingia katika pambano la kufuzu Kombe la Dunia baina ya Wales na Ubelgiji Jumanne ya wiki iliyopita huku akiwa na umri wa miaka 16 na siku 207.

Peter Edwards, 62, aliingia katika jumba la kamari la William Hill eneo la Wrexham mwaka 2000 na kuweka kiasi cha Pauni 50 akitabiri kwamba siku moja mjukuu wake atakipiga katika timu ya taifa ya Wales.

Lakini kocha, Chris Coleman wa Wales, alimwita mchezaji huyo kikosini kwa mara ya kwanza baada ya kuibuka nyota katika timu ya vijana ya Wales na Jumanne iliyopita usiku alimwingiza uwanjani akitokea katika benchi. Jambo hilo ndilo limempatia babu wa kinda huyo mamilioni ya pesa.

Kutokana na pesa hizo pia, babu huyo ameamua kustaafu kazi zake za kuendesha pikipiki eneo la Buckingham alikokuwa akifuatilia mechi hiyo kwa karibu akitumia iPad yake.

Kwa mwaka mzima, Edwards ambaye anafanya kazi katika eneo la Corwen, Clwyd, kaskazini mwa Wales alilazimika kuhamia Buckingham kikazi, lakini baada ya mjukuu wake kumpatia noti hizo sasa anarejea kwa mkewe Dorothy, 58 kwa ajili ya kupumzika.

“Mke wangu amefurahi sana. Mimi ninastaafu moja kwa moja. Nilimwambia Meneja wangu jana (Jumatatu kabla ya mechi) kama Harry akicheza basi siji kazini tena,” alisema Edwards akizungumzia kutoka nyumbani kwake.

“Nimestaafu mwaka mmoja kabla ya wakati. Nimerudi zangu nyumbani na sitarudi tena kazini (Buckingham). Sio mbaya kwa pesa nilizopata.”

Edwards anakiri kwamba aliweka pesa zake baada ya kugundua kwamba mjukuu wake, Harry, alionekana kupenda kucheza soka hata alipokuwa bado mtoto mchanga.

“Alipendelea kuukimbiza mpira kwa mikono wakati akitambaa kabla hata hajaanza kutembea. Hilo ndilo lilinipa wazo la kwenda kucheza kamari. Nilikuwa na matumaini kwamba siku moja mambo yangeenda sawa,” anaongeza Edwards.

Mara baada ya Harry kuonyesha kipaji maridhawa katika shule ya soka ya watoto ya Liverpool, babu huyo alirudi tena katika kampuni ya kamari ya William Hill kwa lengo la kwenda kuongeza fedha lakini alikataliwa.

“Harry alikuwa na miaka 12 wakati huo. Hata hivyo walinikatalia kwa madai kwamba tayari nilikuwa nimeshaweka kiasi cha kutosha kwao. Walitabiri nibashiri kama angechagua kuichezea timu ya taifa ya England.”

Hii ilikuwa na maana kuwa Edwards angeondoka na kitita kikubwa cha pesa kama Harry angeamua kuichezea England kwa vile bibi yake amezaliwa katika mji wa Chester England.

Ushindi huo wa kitita kinene cha pesa kwa Edwards unatarajiwa kumnufaisha Harry kwa sababu safari zake kwenda kufanya mazoezi na Liverpool pia zitagharimiwa na babu huyo.

Akiwa mchezaji kinda, bado Harry hapati pesa nyingi katika soka na Edwards amedhamiria kutumia kiasi cha pesa alizopata kwa ajili ya kumsaidia Harry katika nauli na mambo mengine.

“Hii ina maana nitamsaidia Harry katika matatizo yake. Kuwa na uhakika kuwa lazima na yeye atanufaika katika hili,” alisema.

Kwa kufanya alichofanya, Edwards anafuata nyayo za baba wa kipa wa zamani wa Liverpool, Chris Kirkland, Eddie ambaye aliwahi kupata noti baada ya kuweka pesa katika kampuni ya kamari akidai kwamba mwanaye angeichezea timu ya taifa ya England siku moja.

Akiwa na umri wa miaka 11, baba yake Kirkland pamoja na ndugu zake wengine waliweka Pauni 100 kila mmoja wakitabiri kwamba kipa huyo kinda angeidakia timu ya taifa ya England kabla hajafikisha umri wa miaka 30.

Kuanzia hapo kila mmoja alikuwa akisubiri pesa zake baada ya kipa huyo kuanza kuichezea timu ya England chini ya miaka 21. Kuanzia mwaka 2003, Kirkland alianza kuitwa katika timu ya taifa ya wakubwa ya England lakini hakuweza kukaa langoni mpaka Agosti 2006 alipoingia katika kipindi cha pili cha pambano dhidi ya Ugiriki.

Kutokana na mafanikio hayo ya kukaa langoni siku hiyo, baba yake na wale wote walioweka Pauni 100 kila mmoja, walijikuta akiondoka na kiasi cha Pauni 10,000.