Dk Slaa kunguruma jimboni kwa Zitto leo

 
Katibu Mkuu wa Chadema, Dk Wilbrod Slaa leo atakuwa na ziara ya siku moja katika Jimbo la Kigoma Kaskazini ikiwa ni mwendelezo wa ziara yake ya siku tisa mkoani Kigoma kwa ajili ya kuimarisha chama.

Jana jioni, Dk Slaa alifanya mkutano wa hadhara Mjini Manyovu na kusema kuwa hatishwi na waandamanaji wala vitisho vya kuuawa na kusisitiza kuwa ataendelea na ziara yake kama kawaida hadi Kigoma Mjini.

Awali, akihutubia katika mkutano wa hadhara uliofanyika katika Kijiji cha Malumba wilayani Kasulu, juzi Dk Slaa alisema siyo mara yake ya kwanza kutishwa na kusema analindwa na Mungu.

Licha ya kukabiliwa na upinzani kutoka kwa baadhi ya wanachama wanaodai kupinga hatua ya Kamati Kuu kumvua nyadhifa zake zote, aliyekuwa Naibu Katibu Mkuu wake, Zitto Kabwe alisema ataendeleza kazi kuimarisha uhai wa chama kama ratiba ilivyopangwa.

Akiwa katika jimbo hilo linaloongozwa na Zitto, Dk Slaa atatembelea Vijiji vya Nyarubanda na Kidahwe na kufanya mikutano ya hadhara inayosubiriwa kwa hamu na wadau wa siasa nchini kutokana na mzozo huo uliokikumba chama hicho kikuu cha upinzani nchini.

Mwenyekiti wa Chadema Jimbo la Kigoma Kaskazini, Ally Kisala alisema maandalizi ya mikutano hiyo yamekamilika na kwamba hakuna hofu yoyote ya kutokea vurugu katika mikutano hiyo.

“Tumedhibiti aina yoyote ya vurugu iliyokusudiwa licha ya kuwapo baadhi ya watu wanaotamani hayo yatokee kwa lengo lao binafsi, sambamba na kunufaisha masilahi ya makundi binafsi, lakini hayatatokea,” alisema.

Juzi, wanachama na wafuasi wa Chadema wanaomuunga mkono Zitto waliandamana kupinga ziara ya Dk Slaa katika jimbo lao kupinga hatua ya kumvua mbunge wao madakara.

“Tunaamini mikutano yote ya kesho (leo Jumanne) itafanyika vizuri na watu watapata ujumbe kutoka kwa Katibu Mkuu wetu (Dk Slaa), na pengine wale wanaopiga kelele na kutaka kuleta mgawanyiko ndani ya chama watapata fursa ya kuujua ukweli wa mambo ndani ya chama.

“Vita yetu si kukigawa chama, bali ni kuhakikisha tunaingia Ikulu katika Uchaguzi Mkuu wa mwaka 2015,” alisema Kisala.

Kaimu Kamanda wa Polisi Mkoa wa Kigoma, Zedekia Makunja alisema jeshi lake limejipanga kuhakikisha usalama unakuwapo katika ziara hiyo.

“Tunawajibika kuhakikisha usalama unakuwa vizuri na kila jambo linaendelea kama lilivyopangwa. Mwito wangu kwa viongozi, wanachama na wapenzi wa Chadema ni kuhakikisha wanamaliza tofauti zao mapema ili kuepusha madhara yanayoweza kujitokeza, hatupendi kuona askari wetu wakilazimishwa kutumia nguvu kudhibiti hali ya usalama,” alisema Makunja.

Dk Slaa anatarajia kukamilisha ziara yake mkoani Kigoma keshokutwa kwa kuzungumza na viongozi wa mkoa kabla ya kwenda Tabora ambako atafanya kikao cha viongozi wa Kanda ya Magharibi inayounganisha Mikoa ya Kigoma, Tabora na Katavi.

Mkutano wa Bavicha Dar

Mwanasheria Mkuu wa Chadema, Tundu Lissu amesema chama hicho hakiwezi kuwavumilia watu wanaoendeleza ghasia katika mikutano ya Dk Slaa huko Kigoma.

Akizungumza katika Kongamano la Miaka 52 ya Uhuru lililoandaliwa na Baraza la Vijana la Chadema (Bavicha), Dar es Salaam jana, Lissu alisema: “Naomba niseme suala la Zitto Kabwe ambalo kama wiki tatu hivi limekuwa likizungumzwa sana. Chadema siyo chama cha mtu mmoja, sisi tunaangalia nidhamu, tutaendelea kuwafukuza watu wa aina kama hiyo ambao ni wasaliti na watovu wa nidhamu kwenye chama.”

Mbali ya Lissu, Mbunge wa Arusha Mjini, Godbless Lema huku akishangiliwa alisema, Chadema ina nguvu ya kushika dola mwaka 2015 hivyo lazima iwe na watu wenye nidhamu na si wapenda madaraka.

“Ni vyema ikafahamika kuwa kilio chetu siyo madaraka ni mabadiliko. Hivyo sisi hatuwezi kuwafumbia macho watu ambao hawakitakii mema Chadema... uongozi siku zote ni changamoto, hivyo kufanyika kwa mabadiliko ni kitu cha lazima.”

Mbunge wa Iringa Mjini, Mchungaji Peter Msigwa alisema: “Tukiwa tunasherehekea miaka 52 ya Uhuru wa Tanzania Bara ni vyema vijana tukatafakari kitu gani kimefanyika kwa miaka yote hiyo.

“Miaka 52 ya Uhuru tumeshuhudia ufisadi, rushwa na masuala mengine ya kuwakandamiza wananchi. Kitu cha msingi ni kupambana na mambo haya. Ni wajibu wetu vijana kuamka na kuchukua hatua ya kulitetea Taifa letu.”

Akifungua kongamano hilo, Mbunge wa Ubungo, John Mnyika alisema tukiwa tunaadhimisha miaka 52 ya Uhuru wa Tanzania Bara chini ya uongozi wa CCM, hakuna mabadiliko yoyote na kwamba ahadi ya maisha bora kwa kila Mtanzania haipo.