Vyama vya upinzani vyaweka msimamo

 
 Mkurugenzi wa Habari na Unezi wa Chadema, John Mnyika 
Vyama vya Upinzani vimesema visipopata mwafaka wa mazungumzo baina yao na Rais Jakaya Kikwete juu ya Muswada wa Sheria ya Mabadiliko ya Sheria ya Katiba, vitarudi kwa wananchi kuwaleza hatua ya kuchukua.

Kauli hiyo inatokana na hotuba ya mwisho wa mwezi iliyotolewa na Kikwete, alipoviomba vyama hivyo kusitisha dhamira ya kuandamana Oktoba 10 mwaka huu kudai usawa katika mchakato wa katiba. Kikwete aliviomba vyama hivyo kukaa nao meza moja kwa lengo la kufanya mazungumzo ya kina ili kuondoa tofauti zilizopo.

Hatua hiyo ilifikiwa na Wabunge wa Upinzania baada ya kususia Mkutano wa Bunge uliomalizika mwezi uliopita mjini Dodoma, uliokuwa ukipitisha muswada huo kwa kile walichokilalamikia wananchi kutowashirikisha ipasavyo.

Wakizungumza jana katika Mkutano wa Mashauriano juu ya mchakato wa Katiba ulioandaliwa na Jukwaa la Katiba Nchini, viongozi wa vyama vya Chadema, NCCR-Mageuzi, APPT-Maendeleo, National League of Democracy (NLD) na UPDP walisema, wanakwenda kumsikiliza Kikwete na wasipofikia mwafaka watajua nini cha kufanya.

Mkurugenzi wa Habari na Unezi wa Chadema, John Mnyika alisema endapo mwafaka hautafikiwa watarejea kwa wananchi kuwaeleza kipi kitafuata.

Mnyika alisema Rais Kikwete anafahamu kila kitu kinachopigiwa kelele na wapinzania na asasi za kiraia, hivyo wanaamini watafikia mwafaka katika mazungumzo hayo.

“Tunakwenda kumsikiliza, lakini kama hatutafikia mwafaka tutarudi kwa wananchi na kuwaeleza hatua ya kufuata kuidai katiba yenye tija kwa wananchi,” alisema Mnyika, Mbunge wa Ubungo.

Mwenyekiti wa APPT-Maendeleo, Peter Mziray alisema: “Kinachotakiwa ni mchakato kuanza upya na wananchi waelimishwe. Tukiendelea hivi, maana yake tunaandaa katiba mbovu na isiyo na tija kwa taifa,” alisema Mziray.

Mwenyekiti wa NLD, Emmanuel Makaidi alisema serikali ikubali kwamba imepoteza fedha hivyo mchakato hauna haja ya kuendelea.

Makaidi alisema katiba haitungwi bungeni, ila nje ya Bunge hivyo mchakato kupitia bungeni na wabunge kutoweka mbele masilahi ya taifa ni kuhatarisha mustakabali wa amani.