NYUMA YA PAZIA : Ronaldo vitani, Old Trafford ngao yake

 
KATIKA fukwe za Kitongoji cha Funchal visiwani Madeira, mwishoni mwa miaka ya 1980, mtoto mmoja maskini shombeshombe wa Kireno alikuwa akikimbiza kaa kwa ajili ya kuwauza kwa watalii waliokuwa wanazurura katika visiwa hivyo.

Baba wa mtoto huyu alikuwa mlevi mkata majani wa manispaa, mama yake alikuwa mpishi asiyevutia kwa sura wala umbile, nyumba yao ilikuwa duni na hafifu kiasi kwamba wanaume na wanawake waliishi katika chumba kimoja.

Sasa mtoto huyo ndiye Cristiano Ronaldo unayemfahamu. Huyu huyu ambaye unamwangalia kwa jicho la husuda akiwa amevaa miwani yake ya jua aina ya Prada, viatu vyenye thamani ya nyumba moja Temeke, raba za kisasa zilizotengenezwa kwa ajili yake na nguo za wabunifu kutoka Kampuni ya Armani nchini Italia.

Maisha ndivyo yalivyo. Alikopitia kufika alipo inabakia kuwa historia ambayo kila mtu anaifahamu. Lakini anaporudi tena katika fukwe zile zile za Funchal alizokuwa anakimbiza kaa kwenda kuwauzia watalii, huwa analala katika boti yake ya kifahari na mrembo wake Irina Shayk huku watalii wale wale wakimshangaa kwa jicho la husuda.

Siku chache zilizopita, Ronaldo amesaini mkataba mpya wa kuichezea Real Madrid. Mkataba ambao unamwacha akiwa mwanasoka anayelipwa zaidi duniani kuliko wote. Euro 17 milioni kwa mwaka baada ya makato ya kodi. Kwa sasa ana umri wa miaka 28. Alizaliwa Februari 5, 1985 siku ile ambayo Chama Cha Mapinduzi (CCM) kilikuwa kinatimiza miaka minane tangu kianzishwe. Mkataba wa sasa utamfanya apokee kiasi cha Euro 17 milioni kwa mwaka mpaka atimize miaka 33 mnamo Juni 2018 wakati huo timu zikianza kuwasili viwanja vya ndege Russia kucheza Kombe la Dunia.

Mkataba wake ameupata kwa kuutumia mgongo wa Manchester United. Amewatumia bila ya wenyewe kujijua. Shukrani kwa kazi nzuri ya watu wake wa masoko na matangazo ambao wamemzunguka.

Picha aliyoicheza kwa msimu mzima ni kwamba alikuwa hana uhakika na maisha yake Santiago Bernabeu. Alianza msimu uliopita katika pambano dhidi ya Granada ambapo alifunga mabao mawili na akagoma kushangilia kwa madai hana furaha.

Wengi wakaanza kubashiri kwamba Ronaldo alikuwa njiani kurudi Manchester United. Msimu huu wakati dirisha la uhamisho likikaribia kufunguliwa, watu wake wanaomzunguka wakafanya kazi nzuri ya kueneza uvumi kwamba kulikuwa na uwezekano wa yeye kurudi Old Trafford.

Lengo lake pamoja na wakala wake, Jorge Mendes, lilikuwa ni kuishtua Real Madrid kumpatia mkataba mwingine haraka sana. binafsi nilikuwa sioni uwezekano wa Ronaldo kucheza kwingine kokote zaidi ya Real Madrid.

Kwa sasa amesimama juu ya Manchester United. Wamarekani kina Glazier hawawezi kumlipa Pauni 300,000 kwa wiki baada ya kodi. Kwenda PSG na Man City nalo ni jambo gumu kwa sababu ni timu ambazo zingepunguza heshima ya jina lake hasa wakati huu ambao anapambana na Lionel Messi katika Ufalme wa soka duniani.

Isingewezekana fahari wako akacheza Uwanja wa Nou Camp kila wikiendi wakati wewe unacheza Etihad au Parc des Princes katika timu ambazo hazina historia nene kama Barcelona, Man United, Real Madrid au AC Milan. Ni lazima ufalme wake ungeshuka ghafla. Wakati mwingine pesa si kila kitu maishani.

Timu pekee yenye uwezo wa kumpa Ronaldo kila kitu maishani kwa sasa ni Real Madrid. Inaweza kumpa Euro 17 milioni kwa mwaka, inaweza kumpa mataji, inaweza kumpa matangazo ya biashara na zaidi ya yote inaweza kumletea mashabiki 85, 454 kila mwisho wa wiki huku akiwa amevaa jezi aliyokuwa akivaa Raul Gonzalez Blanco.

Kurudi Manchester United ndiyo uwezekano pekee ambao ulikuwa unamtisha Fiorentino Perez. Ndiyo silaha pekee ambayo Ronaldo na watu wanaomzunguka walikuwa wanaitumia katika kumtisha Perez. Alikuwa akisaka pesa na ngao yake ya kujikinga ilikuwa Old Trafford.

Kikubwa zaidi Ronaldo na maringo yake ya ujana alihitaji pesa za kuingiza jina lake katika historia kama Mwanasoka anayelipwa zaidi duniani. Anataka achezee pesa, aogelee katika pesa, azilalie pesa. Asahau kila kitu kilichotokea katika maisha yake Funchal akiwa anakimbizana na Kaa kwa ajili ya kuwauza kwa watalii.

Anataka kuishi katika dunia anayoishi Floyd Mayweather, David Beckham, Puff Daddy, Thom Cruise na wengineo. Huu bila shaka ndiyo mkataba wake wa mwisho mnono katika maisha yake ya soka.

Juni 2018 wakati timu zikiwasili Russia katika Kombe la Dunia, Ronaldo atakuwa amekaribia kusaini mkataba na Sporting Lisbon, Benfica au Porto hili akazifahidi pesa zake vizuri katika ardhi ya kwao Ureno. Mpira utakuwa umeondoka kwa kiasi kikubwa mguuni.